أحمد عبد الرحمن يكتب : تراويح ليلة القدر

أحمد عبد الرحمن يكتب :   تراويح ليلة القدر
أحمد عبد الرحمن
2019-05-30 17:25:21

شخص : يلا بينا بسرعة علشان نلحق نروح المسجد المشهور نحجز مكان في صلاة التراويح دي ليلة القدر ..

أنا : طيب و بالنسبة لصلاة العشاء ؟

شخص : يا أخي إبقى صليها في البيت قبل ماتنزل ..

أنا : بس العشاء هي الفرض ولو نزلت دلوقتي مش هلحق أصليها جماعة في المسجد ..

شخص : ياعم المهم نلحق صلاة التراويح دي مرة واحدة في السنة إنما العشاء كل يوم طول السنة

أنا : لا يا عم أنا هنزل أصلي العشاء في المسجد تحت البيت وأبقى أطلع أصلي التراويح في البيت ..

شخص : يا أخي اتقي الله حد يرفض يصلي التراويح في المسجد المشهور ده انت كده بتغضب ربنا في ليلة القدر ..

أنا : ياعم إيه الهبل ده ؟ يعني هبقى بغضب ربنا لما اقولك هصلي العشاء في البيت أستغفر الله العظيم من كل ذنب عظيم ..

شخص : استغفر الله العظيم منك إنت مش هينفعلك صيام ولا قيام طول ما إنت أفكارك ضلالية ..

أنا : طيب ماشي توكل على الله قبل ما أخسر صيامي وروح إعمل اللي انت عايزه بعيد عني ..

شخص : آه طبعا هعمل إللي انا عايزه لأنه الصح وخليك قاعد في البيت لوحدك .. ده حتى الستات نزلوا من قبل صلاة العشاء علشان يلحقوا مكان ..

أنا : صحيح مفروض منحرمش الستات يروحوا المسجد لكن الصح هو صلاة الست في بيتها وخصوصا في رمضان ..

شخص : ياعم إنت مخك ضرب واتخبلت خلاص .. يعني أصدقك انت ولا أصدق المساجد اللي مليانه على آخرها رجالة وستات ..

أنا : يا عم صدق نفسك وشوف المساجد دي مليانة في الصلوات التانية ولا لأه وساعتها أحكم بنفسك ..

شخص: الكلام معاك مش هيجيب نتيجة وهتعطلني عن صلاة التراويح مع السلامة هبقى ادعيلك ربنا يهديك ..

أنا : مع السلامة يا سيدي ربنا يهدينا جميعا ..

ده حوار حصل وبيحصل وهيحصل طول ما الناس فاهمة غلط .. حافظين مش فاهمين ..

نحن في حاجة إلى علماء أجلاء يفقهون الناس في أمور دينهم ببساطة وبعيدا عن التعقيدات والتحذيرات والتلميحات , علماء يلتف حولهم ويقدروهم ويستمع إليهم الجميع  ..

حتي لا نجد من يجاهد لكي يصلي صلاة التراويح ويصرف النفيس والغالي من أجلها , ونجده في نفس الوقت لا يشغل باله بأن يصلي العشاء .

اللهم إني صائم

 

أُضيفت في: 30 مايو (أيار) 2019 الموافق 25 رمضان 1440
منذ: 17 أيام, 4 ساعات, 24 دقائق, 44 ثانية
0
الرابط الدائم

التعليقات

362618
استطلاع الرأي
تقييمك لزيارات الرئيس السيسي الخارجية في الفترة الراهنة