بساطة الحياة

 كنا زمان

 نقعد مع بعض

 نتقلب وسط كلام وشعور وحنين

وسنين بتمر ف غمضة عين

 واحنا مع الأسف الساكن فينا

 قاعدين

 أتأمل فيها وهي بتحضن بكرة

ف عيني

كنا زمان

 نقعد ع القهوة ونقرا الحظ

 والحظ بيقرا اللي ف افكارنا

ويجي العكس

ونشاكس ف الاحساس المُر

بلحظة حزن

كنا زمان

نقعد نتسامر

نفتكر الحاج وأيامه

 الله يرحم أيامه بجد

والدمعة تفرّ من العين اللي

 قليل ما بكتش

وأضم الحضن اللي اتربيت

علي حجِره ..كِبرت

كنا زمان

 لو أمي بتعمل حاجة تدوّق

 أهل الشارع كله

 علشان الشارع كله نهار ما بيعمل حاجة

بيبعت لينا

كان كل جيرانا ف نفس مقام أهلينا

كان يوم الجمعة نتجمع...

أمي وابويا وكل اخواتي وناخد بعض

وبنزور عمي خالي... أو خالتي

نخرج...... فين..مش فاكر

 بس بنخرج واصحابي ف أجدع شِلّة ف قلب شِارعنا

 كان قلبي بيفرح

راضي لو صاحبي يعدّي حدودنا

 لو يدخل بيتنا

لو يعرف أمي ..لو قابل أختي

كان صاحبي اخويا كات أمي ف نفس مقام أمه

كات أخته ف نفس مقام اختي

كنا بنفرح

وبنتعلم معني الضحكة عشان نتمتع بيها

ونعلّم كل اللي بيتمني ف يوم يلاقيها..ازاي يلاقيها

كنت انا واصحابي ف وسط الفُسحة نحب نكون مع بعض

 ف الضحك ف الحزن ف اللعب ف الأكل نتجمع ...

نعمل غِدّوة

كان كل المتعة ان احنا نكون ايد واحدة

لو حتي دخلنا خناقة

علشان مدرسة الثانوي الأكبر منا والأقوى

ما تجيش نحيتنا وتعدي حدودنا تستعمر حوشنا

اللي بيجمعنا

اللي انا واصحابي ف وسطه نحب نكون مع بعض

ف الضحك ف الحزن ف اللعب ف الأكل.

 كنت زمان

 لما أقرا الشِعر أحطه ف وسط كتاب الاحصا

وكأني بذاكر

 كان كل اللي يهم أبويا ان انجح

واما انجح ابقي اعمل كل اللي انا عايزه

 كنت ابكي ودمعي ماينزلشي

 كنت امشي لوحدي كتيير

كنت بخاف م الضلمة

وبقدّر معني الكلمة.. لو عدّت برّا حدود جوايا

وعشان كدة كنت اسمع اكتر ومابتكلّمش

كنت بخاف لو يوم اتأخر كنت اقلق من ايه ؟؟

 معرفش مع ان محدش هيكلمني

الشبشب أصلا مش موجود ف قاموس تربية الأهل ف بيتنا

كنت افرح قبل ما يجي معاد الفرحة

أهو كنت بعاند حزني وبس

كنت زمان

بتمني اتفرج علي افلام ثقافية

وان جات الفرصة ف بيت حد من اصحابي الكل يتنّح

والقاني أدوّر وشي الناحية التانية

واروّح واتوضي واصلّي

 كنت زمان

لما احلم كنت بفتّح عيني وأكلّم نفسي

كنت زمان

مش فاكر بكرة مش عارف انه هيجي عليا

كنت بحب الورق الابيض والقلب الابيض

كنت مفكّر ان الناس كلها بتحب.. .

لما لقيتها كنت مفكّر ان جمال الدنيا اتجمّع جوة صورتها

واما صورتها اتشالت من برّوازها ف قلبي

 كان م السهل أشيلها ب ايدي من محفظتي واقطّعها

كان نفسي أتعلّم

 واما اتعلّمت كان نفسي اتكلّم

واما اتكلّمت كان نفسي اتالّم

واما اتألّمت كان نفسي أموت وارجع للدنيا بقلب جديد

قلب زمان وزمان يرجعلي

 دا مجرد .. حِلم.