دنيا طارق تكتب: كلام الناس بيقدم ما بيأخرش
بنفضل ننكر طول الوقت اهتمامنا بكلام الناس باعتبار إن ده هيدل على ثقتنا بنفسنا وقوة شخصيتنا ..لكن في الحقيقة ده كله زيف.
إحنا اتخلقنا عشان نبقى وسط ناس بيحتاجونا وبنحتاج ليهم وده مفيش مفر منه مهما كنت مكتفي بذاتك، ومن ضمن احتياجنا ليهم بتبقى حاجة لكلامهم.
الصح إنك تسمع لكلام الناس -كله- بس تنتقي منه اللي هيفيدك وتتجنب اللي هيضرك.
في حين إن الكلام في كل الأحوال هيفيدك، لو كان حلو فهو هيشجعك ولو سيئ فهو هيشجعك أكتر ولو الكلام أحبطك يبقى ده لنفسك الضعيفة مش لكلامهم المؤذي، لإن الشخصية القوية مش هتتأثر بكلام ومش هتتجنب سماعه بالعكس هتواجهه.
من غير كلام الناس مش هتعرف مميزاتك فتقويها ولا هتعرف عيوبك فهتحسنها مهما كنت بتحاسب نفسك ومهما كنت بتراجع تصرفاتك.
كلام الناس إنذار مهم ماتهربش منه وماتنكروش استجيب له بطريقتك.
