إلهام شاهين:جميع الفنانات العظيمات اتباسوا
قالت الفنانة الهام شاهين: "أقف بصف الفنانة ياسمين صبري ضد والدها الدكتور أشرف صبري؛ مهما كان فيه خلاف عائلي ما ينفعش أب ينتقد بنته".
وأضافت خلال الجزء الثاني من لقائها ببرنامج "شيخ العارفين" المذاع على قناة "المحور": "بقول لوالدها هي اللي مشهورة أنت مش معروف، طالع تنتقد بنتك ليه وتشتكي ليه، والجمهور هيعمل لك إيه؟ والفضيحة مش حلوة".
وعن انتقاد الفنانة ميمي جمال للمخرج هادي الباجوري على خلفية أزمته مع ياسمين رئيس وتصريحه بأنه لا يمانع تقبيلها في أي عمل فني، علقت إلهام شاهين: "عز الدين ذو الفقار لما كان بيخرج لفاتن حمامة أفلام وممكن يبقى فيها قبلة ما حدش كان بيعلق عليه، ومش من حقنا نعلق على بعض وننتقد بعض، وفيه قبلات كتير لفاتن حمامة مع عمر الشريف وعماد حمدي، وفيلم نار الحب من إخراج عز الدين ذو الفقار، وهادي الباجوري هو حر يقول اللي هو عايزه".
وتابعت: "الفنانات العظيمات اللي اتربينا على فنهم ولحد النهاردة بنسعد بأفلامهم فاتن حمامة وشادية وهند رستم وسعاد حسني ونادية لطفي كلهم عندهم قبلات في الأفلام هل حد قال إننا مش بنحترمهم"
وردَّت الفنانة إلهام شاهين على الفنان أحمد فلوكس بعد تصريحه ضدها "أتمنى تجهزي رد لربنا عن القبلات لما تقابليه".
وقالت إلهام شاهين في الجزء الأول من نفس اللقاء: "إنتو بتعطوا أحمد فلوكس أكبر من أهميته ومش هرد على أي فنان".
وتابعت: "أخدت على عاتقي إن أنا محامي الفنانين، ولكن بقول له متربطش الدين بالفن، وقلت له أنا لو عملت واحدة قاتلة هتقول لي ده ضد الدين ولكن أنا مش ههاجمه، ومش هوصل لفكرة الفتنة الفنية".
وأكملت إلهام شاهين: "أنا مش عارفة هو ليه بيهاجمني، ويمكن هو عايز يركب التريند لأن الأضواء بعدت شوية، أو يلفت النظر، والغريبة أنهم قالوا لي أنه اعتزل فلما أنت اعتزلت وبقيت بعيد ليه تهاجمني، وقالوا لي أنه نفسيًّا مش مظبط، وبقول له الله يكون في عونك وبيصعب عليا الفنانين، وهو صعبان عليا بجد، ولو تعبان من أي حاجة ربنا معاه".
