جمال عبدالحميد لـ”الصباح العربي”: الأهلي خسر مكانه لبيراميدز.. ومصطفى محمد لو مبقاش خليفتي مش هيخسر حاجة

قال الكابتن جمال عبدالحميد، نجم الزمالك ومنتخب مصر السابق، في تصريحات خاصة لموقع الصباح العربي، إن نادي الزمالك يملك كنزًا بشريًا من أبنائه القادرين على إدارة الملفات الفنية والإدارية بكفاءة عالية، موضحًا أن معظم مدربي الدوري المصري حاليًا من أبناء القلعة البيضاء، إضافةً إلى تواجد عدد كبير منهم في الخليج والدول العربية حيث يحققون نجاحات كبيرة.

وانتقد عبدالحميد، ما وصفه بـ"تجاهل متعمد" لأبناء النادي في المرحلة الحالية، قائلًا: "جون إدوارد بيرفض يستعين بالزمالكاوية علشان خايف على مكانه كقائد لملف الكرة.. عايز يجيب ناس من بره علشان يقدر يتحكم فيهم، وفعلاً بعد ما المجلس ادّاه الصلاحيات، ابتدى يجيب مسؤولين من خارج النادي".

وأضاف: "ده بداية الفشل، لأن الزمالك مش ناقص عناصر من جواه.. عندنا نجوم كبار قادرين يديروا أي قطاع جوه النادي.. مفيش مبرر منطقي للجوء للغرباء إلا إنك عايز تبقى القائد الأوحد، وده مش في صالح الزمالك".

صفقات كويسة بس مش سوبر

ورغم تحفظه على سياسة التوظيف، أشاد عبدالحميد ببعض جوانب عمل جون إدوارد، قائلًا: "بصراحة هو عامل شغل كويس لحد دلوقتي، والصفقات اللي جابها لعبوا بشكل ممتاز في أنديتهم القديمة، لكن المشكلة إن مفيش بينهم لاعب سوبر يقدر يشيل الفريق على كتافه".

وتابع: "إحنا محتاجين لعيبة تقيلة، أسماء زي مصطفى محمد، أو محمد رمضان، أو أحمد عبدالقادر.. دول لعيبة ممكن يغيّروا شكل الفريق بالكامل، إنما الموجودين حاليًا، عندهم خامة كويسة، ومع الوقت ممكن يبقوا نجوم فعلاً، بس لحد دلوقتي مفيش واحد تقدر تقول عليه 'الصفقة اللي هتفرق'".

وأكد عبدالحميد قدرة الفارس الأبيض على المنافسة قائلاً: "الزمالك بيتولد منافس.. حققنا بطولات في أصعب الظروف، أيام الحجز على النادي أخدنا 2 دوري وكأس، إحنا مش بنعتمد على الظروف.. بنعتمد على الروح والانتماء والجمهور".

وردًا على ما تردد بشأن انتقال مصطفى محمد للأهلي، قال بوضوح: "أنا عمرى ما قلت إنه لو راح الأهلي مش هيبقى خليفتي، ده كلام مينفعش يتقال، مصطفى محمد لاعب كبير، وعنده انتماء حقيقي للزمالك، ومش هيخسر حاجة لو مبقاش خليفتي".

بيراميدز خد مكان الأهلي

وتطرق جمال عبدالحميد لأداء الأهلي في بطولة كأس العالم للأندية، قائلًا: "رغم وجود نجوم كبار في الفريق زي إمام عاشور، وبن رمضان، وبن شرقي، وزيزو، الأهلي طلع آخر مجموعته في البطولة وخسر من فرق ضعيفة جدًا، وخليني أقولك بوضوح: لو الفرق دي لعبت ضد سيراميكا كليوباترا أو الاتحاد، هتخسر بنتائج كبيرة".

وفيما يتعلق بمقارنة بيراميدز بالزمالك، علّق قائلًا: "في ناس بتقول إن بيراميدز خد مكان الزمالك، وده غير صحيح تمامًا، الحقيقة إن بيراميدز دخل على ساحة الأهلي في أفريقيا، مش الزمالك.. ومع ذلك الزمالك كسب بيراميدز في كأس مصر، فده ما يغيرش مكانه، الزمالك ثابت.. اللي بيخسر مكانه هو الأهلي".

وأشار إلى "سطوة الإعلام الأحمر" بحسب وصفه، قائلًا: "إعلام الأهلي مسيطر على عقول الناس، بيقول أي كلام، والناس بتصدق وتمشي وراه من غير ما تفكر".