عمرو سلامة يقدم التعازي لباسم يوسف فى وفاة والده

قدم المخرج عمرو سلامة، عزائه للإعلامي الساخر باسم يوسف، بعد وفاة والده.

وكتب سلامة، عبر صفحته الشخصية على "فيس بوك"، "عن واحد اسمه باسم يوسف، هو شخص شاف برنامجه الأكثر نجاحًا في التاريخ بيتوقف، شاف اتهام كل الناس ليه، حتى الناس اللي كانت بتسقفله ومبسوطة بتأثيره أيام ما كان تأثيره ده على هواهم".

وأضاف المخرج: "شاف إنه يخرج من بلده ويتغرب بسبب حكم كلنا عارفين أسبابه، شاف أمه بتموت وهو بيواجه أكبر حملة تشويه، شاف أبوه بيموت بعيد عنه وهو مش عارف يرجع يدفنه، هو شاف كل ده، في الوقت اللي كل اللي شفناه منه حلقات بسطتنا وضحكتنا وفشت غليلنا في الظلم اللي حولينا".

وتابع: "باسم ممكن يكون مش على الشاشة، مش في بلده، أحبابه بيتخطفوا منه بشكل قاسي، لكني متأكد إنه جوا قلوب كثير، على الأقل القلوب اللي متشوهتش ومخليتش الكره يملاها".

وقال عمرو سلامة: "قد نكون كلنا عاجزين عن إننا نساعده دلوقتي زي ما إحنا عاجزين نساعد مظاليم كثير، فيهم حتى اللي إتظلم أكثر منه بكثير، لكن وجودنا على أرض الدنيا مالوش أي معنى غير شوية السذاجة اللي جوانا اللي بتخلينا نصدق حتى ولو بنسبة ضئيلة أن هناك نهايات عادلة وسعيدة".